Малітоўны ўспамін у Міжнародны дзень вызвалення вязняў нацысцкіх лагераў

11 красавіка адзначаецца Міжнародны дзень вызвалення вязняў нацысцкіх лагераў. Ён быў уведзены паводле рашэння ААН у памяць пра міжнароднае паўстанне вязняў канцэнтрацыйнага лагера “Бухенвальд”. 11 красавіка 1945 году над Бухенвальдам залунаў сцяг свабоды.

11 красавіка 2013 году апостальскі візітатар для грэка-католікаў Беларусі адслужыў памінальную паніхіду на тэрыторыі лагера “Майданак” у Любліне. 

У малітве ўзгадалі ўсіх беларусаў, якія былі вязнямі Майданака, а асабліва беларускіх дзяцей, якіх перавезлі ў Майданак з Берасця.

Асаблівыя памінальныя Службы за ахвяраў нацысцкіх лагераў прайшлі 10 і 11 красавіка 2013 году ў грэка-каталіцкіх парафіях св. Язафата ў Полацку і Маці Божай Нястомнай Дапамогі ў Менску.

***

Асвенцым, Майданак, Трэблінка, Бухенвальд і шмат іншых месцаў на мапе Еўропы былі ператвораныя ў прылады масавага фізічнага знішчэння людзей падчас Другой сусветнай вайны.

На тэрыторыі Беларусі, па дадзеных Надзвычайнай дзяржаўнай камісіі, створанай у 1944 годзе, налічвалася больш за 260 канцлагераў. Самыя вялікія знаходзіліся ў Мінску - у раёне Нямігі, і ў Трасцянцы, а таксама ў Азарычах, Гомелі, Полацку і Бабруйску. У такіх месцах было знішчана больш за адзін мільён чатырыста тысяч чалавек.

На тэрыторыі нацысцкай Германіі і акупаваных ёй краінах было больш за 14 000 канцэнтрацыйных лагераў, у якіх чыніліся жудасныя злачынствы.

Падчас Другой сусветнай вайны праз лагеры смерці прайшло больш за 20 мільёнаў чалавек з 30 краін свету. 12 000 000 чалавек не дажылі да вызвалення.

Каментары: